WAANDELKLAANKEN
Waandelklaanken
in die maot
waorin praot van wieder
altied wieder en wieder
net as het verkeer hier
nou ik een zettie op boeten zit;
waor gaot ze hen?
het is hier
met waandelklaanken in die maot-
en dommiet volk an de praot
over wat ze hier
um en naobij en in Aa en Hunze
an maans gaot hebben;
cultuurlijk dit jaor in en weer oet:
hoou of wat
dit en dat
zus en zo
en wat aal neeit;
d'r komt klaanken op batterij
laangs het pad
op oous an
binnenkaant binnen
raokt de snaor die trilt
haarteklop in de beein
langzaom unumkeerbaor
d'r is JA zèegd
op cultuurriek te weden
op cultuurlijk te weden
op oetgaangspunten te bepaolen
op ingaangspoorten lös te dooun
op saomengaon van natuur en cultuur
op binnenlaoten van boeten
op regio en legio
op kommen kieken en kieken laoten
(en dan is d'r ok spraoke van overlast
ach ja waor wodt dat niet op de muren krast)
op de opera vol toekomstvisioenen
van dit laand um oous hen
waor het gries de kleuren et
en kuuroorden gruit oet de grond
waor Oerol anspeuilt
(laow maor kieken wat het wodt)
klaanken vol rook dan weer
rook die sprek van vortgaon
in herinnering en vurig verleden
d'r is JA zèegd
op de veurstelling vol echo's
op ideëen die borrelt
op zwaonen en meer
op Walkyre in veule gedaonten
op heur plaots in de dreven
op old en nei leven
op wat het was wat is wat zal weden
op mystiek op mysterie
op saomenkommen van daans klaank woord
op het verhaol dat tot leven komp
op daans in het Zwaonemeer
vanzölfsprekend cultuurlijk
het steeit al klaor daor
-en...het weer speult met-
het waoter komp umhoog
het klinkt en klòkt
het nemp met en speuilt an
wees maor het straand
Aa en Hunze komp an laand:
Cultuurlijk!
Hier is parade maokt
gien pas op de plaots
maor met de meziek met!
- Egbert Hovenkamp II-