TAOL-LENS
Elks plaotie
vertelt een verhaol;
verhaolen maokt maangs
plaoties-
heuil wat volk op batterij
um te kieken
um te luustern
wat wuj heuren?
wat wuj zeein?
wat kunj heuren?
wat kunj zeein?
wat duur ij heuren?
wat duur ij zeein?
(De dichter
breit breeidoet
met woorden
döt oet de doouken
stilt taol
tot zichtbaorheid)
D'r wodt oetstukt
hoou
waorum
waorhen
waorvort
In dizze zaol
waor deurgaons
revelt wodt
over wat wel
wat neeit
wat wel wet
klinkt nou woorden
over wel wel
wel neeit
over foto's, overwegend
(Het eerste exemplaor
komp in goeie haanden
in een welkom heeitend haart)
Het gedicht
sprek van zun
op wat besteeit
wat wiedergeeit
wat, in wezen, blef bestaon
as wij leven veur ogen hold
En dan
mien veurnaomgenoot
met gitaar
met stem
en de daansende, inkerende,
glaanzende, bezwerende
woorden;
over het peerd
en het wezenliek holden van dat peerd
over het peerd
en de vaoder die holdt van dat peerd
over leeifde
over kraacht van leeifde
over in leeifde opstaon en wiedergaon
een peerd, een man, een saomen,
een eein-wezen
over daj bint waoraj bint
over eeinvold
over wat is
over wat waor is
over wat hier en daor is
over dat het meer dan schier is
over dat binnen boeten is
over dat het thoes is
over dat het daor en hier is
kiek een eiber
kiek nevel
kiek maor
duur maor
over dat veld
met siep, schaop en scheper
over het kleine
op de kop
over het dwelen
over guster
over dauw
over kom maor hier
op de hei
en dan saomen kieken
laachen
leeif hebben
leeif wezen
over de zunnestraolen
op oous
op het veld
kiek maor
an en oet
(en dan gledt stilte
d'r over
en dan gef stilte
het een stem)
En daor is Jan
die as niet dichten kan
(zeg e zölf)
maor verhaolen staot op
staot in veur kniezen:
een bellon steeit klaor
um op te gaon
met sensaotie, met schieterigheid,
met nuchterheid, met haanden vol zweeit,
met kraamp in de kuten,
met alderbarstens oetzicht
(aj zullen duren),
met woorden stokt in de haals,
met stief staon waoraj staot
kiek maor
De Dames Samen,
de Wichter Tegaoder,
bouwt op
laot zeein
wat ze heuren laot
wat haor is
wat waor haor is
wat haor waor is
waor de minnaor is
waor wel of gien haor is
...badmat wel döt mij wat...
...schrieven en schilderen...
...knuppen en knooien...
...narcissus en naorstig...
elkse dag vanneis
as vanolds
elks schilderij op zien plaots
klinkende plaoties
plaots vunden klaanken
en zo wieder
Dommiet opstaon
en praoten gaon
dat he'k nou daon
.
( Egbert Hovenkamp II)