MOMENTUM
Dit is een momentum
veur monumenten -
dit is een momentum
veur cultuur;
je kunt rondzwarven
van het eein naor het aander
laot het je zintugen
maor nei dooun
Kiek maor
beleef maor
dommiet komp d'r nog veul meer
van 't olde
van 't neie
Ankommend jaor
zal d'r veul op batterij kommen
in dizze gemeeinte -
dizze culturele gemeeinte
van het jaor
De meul wet van gien wieken
in de kerken is veul te kieken
en dizze dichter
mag taol gaon weven,
mag zuch taol laoten weven;
lang mij de pen maor an
en wat vellegies wit pepier
mien haand geeit gaangs,
zal schrieven gaon
wat d'r beleefd wodt
wat d'r inleefd wodt
Gao d'r maor op oet
kom d'r maor in
kom d'r maor op
kom d'r maor bij
gao maor met an dooun
pak je penseel
kiek deur je camera
waor wat woorden
speul een rol
wees jezölf
hol maor vol
kiek daor hej een kerk zunder preek
daor een meul zunder maolen
daor een kroeg met meziek
daor eein met schrieverij
daor een ruumte waor aj
kunt knooien met keramiek, speksteein en glas in lood
wiederop kunj zingen in een koor of wat
of yoga dooun of de Hondsrug op
Wel Aa zeg, zeg Hunze
wel nix zeg wodt niet heurd
wat ik zeg geeit veurbij
wel wat bewaord die hef wat had
Culturele Gemeeinte
van het jaor 2011 -
kop d'r veur
haart wied open
gebeuren laoten
laoten gebeuren
D'r geeit gien C te hoog
d'r steeit een C te kiek
waor die veur steeit
zal ankommend jaor blieken
gao maor beleven:
C en Aa en Hunze
(Egbert Hovenkamp II)