D'r is nou nog een stilte
asof d'r een domnee
laangs geeit:
roezemoes is d'r wel
binnenkommend volk
dat zuch vernuvern wil
(dat doout ze al:
"Kiek, dat is Bob Fosko!"
en, warkelek waor, hij is 't)
op naor de munten
op naor de kovvie
op naor een schriefstee
ik heb een zitstee
op een volle tribune
Wolken sliert umheer
een klein beettie zun nog
een giertank steeit op scharp
een trekker löp zuch waarm
volk holdt zuch waarm
met dekens um de beein
de tribunes wod volpropt;
"een èendtie opzied..
nog wat..
ja..
d'r kunt d'r weer tweei bij"
een trekker hef wat an maans
döt plestiek um 't heui
redt van oous vort
meziek komp d'r an
een slaovenpas
de duvel schet aajt op een bult
wodt oous vertèeld
een glierende gitaar
een hek vaalt
een nei hek steeit
een streekeigen hek
een streekeigen looppas
mak dat e vort komp
um ruumte te maoken
veur de tooukomst
op zeuik naor een balaans
ale neimoodse kwaolen
en heur oplössings
(op mien geboortegrond
bint preblemen
ik heb de oplössing:
kom praot d'r over
met een kop kovvie
en een plak stoet d'r bij)
ik zit hier vaast
ik wil d'r oet
ik weeit niet waorhen
ik wil d'r oet
ik weeit niet naor waor
ik zit an taofel
d'r wodt op mij foeterd
ik vertèel wa'k zag
wie as ik sprak
(ze wilt mij niet heuren)
ik zit an taofel
d'r wodt op mij foeterd
ik stuk oet
d'r wodt mij oetstukt
dat hier mien leven lig
umdat 't d'r altied west hef
dit laand um oous hen
(maor ik zit hier vaast)
ik wor hier vaast zet
umdat hier mien wortels ligt
(ik dreum mij lös
de baankman komp op mij an
wil mij wat leeinen
getallen duukt op
almaol ciefers
-nee, ik verkoop 't neeit-
ik stao an 't graf
opa steeit op oet zien graf
-IK WOR WAKKER-)
een ritueel vaangt an
Drenthe wodt oetstukt
een haon rent
veur de troepen an
(undertussen op 't resort
klaogend volk
over van ales en nog wat)
-ik zit hier vaast
in een stilstaonde tied-
NOU NOU NOU
"Gao van mien laand!!"
"Oprötten!!"
"Gao vort!!"
Kroegpraot
vingerwiezings
-ik wil hier niet vaast zitten-
Allent maor knechten
Allent maor slaoven
slaoven van de draank
-ik bin hier weerumkommen
maor een veraandering wult ze niet-
Rood kleurt de locht rechts
tactische praot in het waogentie:
een leeid wodt zungen
over oet je ogen kieken
naor een nei begun
maor niet allent
maor met je an mien zied
-ik wil hier vanneis begunnen-
Daor hej ze: de apparaoten
die as het olde laand eet
en weer oetspijt as neie
grond van maokbaor bestaon
Vrouwlu revelt en revelt
en revelt over keerls
en ik bin veraldereert
van de wies - oet mien hum
-ik heb genog
van die poppekaast
-ik zit hier vaast
wil hier vort
-ik krieg jeuk
van dat gedoou
(Undertussen in de kroeg
een saomenkomst
van alerhaande
goenende wodt vortstuurd
goenende gaot zölf
-PROOST-
-ik zit hier vaast-
kiek oet naor de karmis)
"Moi"
"Moi"
De zenen gaot gieren
aw weer bij mekaor bint
en dan de karmis
lochies, botsauto's
doden staot op oet het graf
daanst met
karmis op de brink
(weerumpraot over
wat was
en wat kommen kan
-andacht
wult ze)
te laang jao en aomen
knikt
mörgen vol zörgen
laot je duvels lös
daans met mij met
een nei leven laacht
Ales geeit zien plaots weer vinden
veur ales is een tied
in en oet het duuster
klinkt meziek
vörms struunt
deur 't laandschap
waorhen
waorveur
een hoes wodt bouwd
d'r wodt foeterd
en dan op pad
um je verwennen
te laoten
nou hej de steeinen
an 't rollen
je wodt glad
je wodt rond
rol deur 't leven
wij gaot maor
'ns weer op hoes an
tieden veraandert
de paacht löp of
slao an barrels
de heuile zooi
an taofel maor weer
oetbreiden kan niet
nix kan
laot je maor inweven
laot je maor gaon
de eein komp oet de tied
de aander trapt d'r in
tot het inzicht komp:
leeifde veur een mèens
leeifde veur 't laand
waor gruijt
waj zeijd hebt
waor aj oogst
waj zeijd hebt
kop d'r veur
op pad maor weer
laot maor lös
gao maor lopen
......................................
( Egbert Hovenkamp II)