KEER OP KEER WEER
I.
(In de auto naor)
Op pad
maor weer
naor de kerk
van de cultuur
veur dizze dag;
op pad
in Aa en Hunze
op pad
naor waor
het pad mij brèengt
II.
('t Keerpunt)
Welkom in 't Keerpunt;
Willem
net oet de berrestee-
ik met Linde,
waor as ik gister was,
nog in de beein
een kop kovvie
brèengt mij
weer op de beein
Volk lop al
binnen
stukt mekaor oet
wat ze gaot dooun vandaog
ik weeit al
wat ik an maans
gao hebben:
op pad
deur Aa en Hunze -
waor ik kom,
wat d'r zal weden,
ik zal wel zeein
wat ik hier zeei
op boeten
veur 't Keerpunt
is in elks geval:
de zun
belonnen
hoezen
veurbij snitternd verkeer
tour de fransers
(de siepies zit
te joestern;
ze kriegt wat te drinken)
en de wind weijt
en de hoezen wordt wakker
en de zun schient
dizze woorden
in leven
en de zun schient
dizze dag
in leven
en de zun schient
Aa en Hunze
in het locht
en de zun schient
en de zun schient
Ik bin op mien stee
in dizze umgeving
in dit tempo
in pluk de dag
in zitten in de zun
ik bin op mien stee
(het bellegie
an de deur
klingelt -
volk lop in en oet
op binnen wordt laacht
op boeten zit dichter dezes
in de zun;
wel döt mij wat?
Dit döt mij wat!
't Kun minder)
Op binnen -
kippevel
Johnny Cash klinkt
&
d'r steeit ineeins een bever
Op boeten -
gruijt het schilderij
zichtbaor
III.
(De Kunststee)
Kunst haangt te kiek;
waj zeeit
is wat zichtbaor
maokt is
deur haanden
die as op heur beurt
deur ogen
anzet wörden
um zichtbaor te maoken
laandschappen
um in te dwaolen -
abstracte kunst
um in jezölf
te verhaolen -
een boerenstee
weergeven
met vörmen
die aj niet zeeit
maor wel gewaor bint -
peerden, beeist,
wuivend gras,
bomen, een tuut
laot je ogen
maor glieden
laot je ogen
maor spreken;
taol gledt mij
integen
en kuiert op pepier
dit hier
deur
dat daor
wieder maor
weer
(regen döt niet zeer)
IV
(Atelier Geke Hoogstins)
Geke döt Walkyre
oet de doouken;
witte wieven daanst
veurbij;
historie gledt bij oous
hen binnen;
verhaolen die as
schilderijen maokt hebt;
barkebomen oettakkings
van gister naor vandaog
naor mórgen;
het wichie van Yde
lat zuch zeein
aj je ogen
stief dicht doout;
Walkuren
dwaolt van hier
naor gunder -
komt op batterij
in hemel
in hel
in wat waor is
in wat waor
dan ok is -
't Witte Wiefke
daanst
en hij
geeit met
geeit weerum
met heur
en zij sprek van:
"IJ heuift niet
baang te weden
alles hef zien plaots
alles hef zien tied"
en ze laot mekaor
weer lös
het kind blef
en leeft
binnensteboeten -
echoot
wat um heur hen
klönk
en lat het klinken
het blef klinken
aj gooud luustert
aj leeifde tooulaot
aj leeifde tooustaot
Leeifde is een geheim
leeifde is waor aj
in thoes heurt
leeifde is wat gebeurt
("Wichie, mien wichie
laot de sluiers
weijen
Wichie, mien wichie
verschien maor
oet de eerde
Wichie, mien wichie
hier bint mien ogen
hier bint mien haanden
hier is mien leven
het steeit wied open
Wichie, mien wichie
zo laang verscheulen
kom maor, kom maor
de sluiers
hebt heur tied had
de sluiers
laot je lös
Wichie, mien wichie
hier bint mien ogen
hier bint mien haanden
hier is je leven
kom maor, kom maor
Wichie, mien wichie")
V.
(Breeland)
Dan is d'r meziek
waordeur aj
opengaot
Meziek
die open döt;
de deuren
wied waogend -
klaanken sprankelnd
stem dringt deur -
je verstilt
maor vaalt niet stil
de stilte
daolt
as het waore
um je hen
en ij d'r middenin
meziek
waore meziek
die as wat
te zeggen hef:
laot het locht
braanden
je bijlochten
op het pad naor
Örgenswaor
laot het locht
in je haart
je bijlochten
op het pad naor
WaorOjOkKomt
laot het locht
het duuster
oplössen
je bijlochten
op het pad naor
WiederMaorWeer
(opeeins wor ik bliede maokt
met stokstoet
met brie
eerdbeien
brummels
komkommer
en zuks wat hen)
en de meziek geeit
wieder
almaor wieder
dankjewel, Martin
voor sprankelklanken
voor binnenstebuitenstem
voor muziek
die openstaat
VI.
('t Keerpunt)
Op tweei steden
niet west;
't kun niet aans
hier bin ik weer
waor ik begunde
en keer mij weer um
altied maor weer
vort maor weer
keer op keer
punt
(Egbert Hovenkamp II)