Een schiere stee
in aodemend laandschap
met oetzicht riept deur inzicht
ik bin d'r um en naobij geboren en opgetogen
ik kiek um mij hen
naor het volk op de stropakkies
die as klaor zit
en luustert naor de oftrap
des burgemeeisters
(op boeten lig 't laandschap
te waachten um met ogen
dookdekt doekt te wodden
opnummen te wodden
in een waarme stee in haart en ziel)
Een slim schiere stee hier;
op binnen rolt de woorden
die oetstukt, oetneudigt
um woorden te weven
vanoet het wark van Albert
die as een stem gef an dit laandschap
waor um en naobij ik geboren en opgetogen bin
waor wij nou underdak bint
dizze middag -
in gelul kunt wij niet wonen
ok 't laandschap neeit
wodt citeerd
en of d'r naor haandeld wodt.......?
(Op boeten lig 't laandschap
en rekt zuch nog 'ns oet
naor een einder, uneindig
de pokkel van 't laandschap
lig open en bloot en verleidt oous)
Op binnen, de woorden
wegwiezers naor 't laandschap
op plaotties, waorop:
lochten, hoezen, febrieken en mèensen
die as d'r woont, die as 't vörmt,
die as d'r van vervrömdt;
haanden in de buus
haanden thoes
haanden oet de mouwen
haanden in unschuld
Woorden revelt; stoere woorden
beleidswoorden, historiewoorden
(Op boeten lig 't laandschap
en is an 't kniezen
waant het sprek vanzölf
sprek ale woorden tegen
waant döt wat 't döt
al eeuwen, al levenlaang)
Natuuruntwikkeling kunj ingewikkeld maoken
je kunt oetstukken waj niet warkelek begriept
doou d'r maor 't zwiegen toou
kom in de beein en zink in de schoot
van Moouder Natuur
in een berre van welkom
laot je maor metnemmen
naor een hoogtepunt
vol oet- en dan inzicht
(Op boeten lig 't laandschap
te stennen en rop naor oous:
"Kom oet je woorden
zwieg je binnen bij mij!")
Meul, kerken, boerderijen
bomen, grös, ales op stee
windmeulens van je maolen
wind wult ze vaangen
oetzicht wult ze vreten
vleuiken naor het stroompie
dat as stroomt
van nou naor laoter;
kaant, waal, waoter
(Op boeten keert 't laandschap in
en strooit dreumen um zuch hen;
warkelekheidsriepe dreumen
stukkie bij beettie
wij kunt d'r weeit van hebben
aw inkeert in laandschap
dat as aodemt
in en oet
in en oet)
Occupy je geweeiten
Occupy 't laandschap
zunder graoperige haanden
Occupy waoter, laand
oetzicht op binnen en op boeten
Hier zit wij op pakkies
pakkies van het laand
pakkies van oous haart
(Op boeten: laandschap
op boeten: locht
op boeten: ruumte
op boeten: zwiegen
op boeten: de rooup
van wat besteeit
en waj waor kunt nemmen)
Heur 't verhaol
en kom op en in je eigen
zunder woorden
riek an spraok
wees loos
stem in
gao maor verdwaolen
pas dan krieg ij weeit van de weg
- Egbert Hovenkamp II-