Een neie harfst
blaodervalend geluud
op een terras
waor regen plaotsvindt;
volkloos - wolkenriek
hier op binnen klinkt het weer raok;
ale tied an oouze kaant, veur
het vuur, dreumend over locht
naor duuster, fluusternd heuil
stief bij mekaor en wij loodst
oous deur de tied die an
oouze kaant steeit - van het
duuster naor het locht
waorin literatuur zuch toont
tussen Zuudlaoren en Schipbörg,
bouwwaarken in de beein,
kinder in de beein, haanden oet
de mouwen, haanden oet
de buus, Jozeknien löp veurop,
wet gien weg met de bever,
kinder weeit wel raod,
komt met woord en daod
hier op reis met meziek,
van noord naor zuud, op reis,
ales aachterlaoten, wied vort
van hier naor daor, zunder
kaort, wegwies op geveuil, deur
bochten, over bargen, oetzicht
riept zuch tot inzicht en
wieder weer, zwaart op wit
net as kunstenaors in open gaoten
kunst toont, plaotsen waor as
nix is, plaotsen waor aj deurgaons
an veurbij gaot, laot
nou naor zuch kieken, de
warkelekheid naor de haand zet,
open gaoten vuld met kiekbaore kunst;
prikkels, wikkels, waogerij
schiere daogen, heuile schiere daogen,
waorin wij rondstruunt,
alemaachtig wat een schiere dag,
ales aachter oous, met zicht
op mekaor, dizze schiere dag,
mooi daj bij mij bint, dizze
dag, dizze schiere dag, dizze
oogst, dizze dag
op een podium, een nei podium,
een verbindend podium, een
podium dat voldöt an de
criteria, isolaotie, orgaonisaotie,
een eigen plaotsie,
een zwaarvende stee, meziek
geeit klinken, geeit klaanken
geven, geeit plaots vinden
in ale seizoenen, zun en regen,
meziek kan d'r tegen
- Egbert Hovenkamp II-