Een kop kovvie
wör anlaangt
meziek zingt oous toou;
lèegt bloot
sprek an
sprek van 't hooge laand
met locht
met torens
met aal dat dit oetzicht toont
't is waor aj je aodem haolt
je dreumen aachterlaot
um waor te weden
as overzicht van wark
van de haand van vörmgever en tovenaor
met haandschrift dat as sprek
dat as vanzölf sprek
van zuchzölf sprek
dat Drenthe sprek
dat veur Drenthe sprek
dat vertèelt van geknooi
en gekloot met de dreven
maor wie blieft toch bie mekaor?
doe bie mie? lekker stief bie mekaor?
doe blefst toch bie mie
um een laaidtie te zingen
van deurgaond leven en natblievend wotter?
doe blefst toch bie mie?
zunder dook of vraogtaaikens?
het Drentsche Peil steeit op neie hoogte-
meziek gef d'r klaank an
neie stemmen die as heurd möcht wodden
het podium steeit klaor
nem maor plaots
het peil steg tot heurbaore hoogte
leg je oog en oor te luuster en te kiek
nix meer oet te leggen
hol toch op
verklaoren is gien vertrouwen ineeins
binw te nuchter wodden
um leeifde wakker te smokken?
um te vergeten
um te verstaon?
kom, laow kieken, laoten blieken
daw niet te nuchter veur de haartslag bint
die as ook kloppen kan as d'r plezeer is
in aal daj doout
aal dat kunst vertellen kan
over monumenten, over momenten
weer- en angeven deur
wat zichtbaor in roeme maote
wat 't laandschap een stem gef
waj heuren kunt met ogen die welkom heeit
as dit kwetsbaore oetzicht
waorin wij plaots vind
- Egbert Hovenkamp II-