Ah de zun
zat van tied
en tied zat
straolen die strukelt
over een deurweeikte zummer
en d'r kan nog wel een druppeltie in de emmer;
begeleid deur een steelguitar
en snaorenspel op pad over
de befaomde Route 66, belevenissen
vanolds, vanneis - unophoudelek
veuroet en weer naor hier
(met meziek aachter de koezen)
theaoterspektaokel deurhen
de stad, met plannen veur
een warkplaots um talenten
te laoten riepen, op locaotie,
op zeuik naor een passende
plaots, het zeeikenhoes, de
olde viever in de bos, waor nei
volk op batterij komp en toont
wat van weerde is, waant aans
kunj 't niet zeein
net as de leeifde; as 't geluk
gien woordtie metsprek klopt 't
niet - van mekaor holden,
mekaor missen van tied tot tied,
kom maor hier, blief maor bij mij
in de zeuite, zunrieke mörgen
um sonnetten te schrieven,
um in een bepaolde ruumte
te blieven, um te zeggen wat
spreekbaor is, taol en teeiken
op pepier en an de waand,
worstelings, belevings en gedaachten
van een aander laoten stromen
zoas Noach zien lot, zien vlot,
zien holt, in haart en haanden
meziek in harsens, met een glas
veur ogen, ogen die zeuikt
naor je, in de naacht en ontij,
daor steeit het glas, hier is de
störm - dèenk ij daorin an mij?
zoas ik an je? met een glas veur ogen?
as in een opera, zoas die zuch
ofspeulde op het laand en nou
naor 't theaoter in de Grote Stad,
welkse kneivaal, welkse
aoderlaoting? wat zal d'r nog
zichtbaor weden van de aodem
van mèens en grond, van mèens
en weer en wind, maok je je
lös van de warkelekheid veur
theatraole wetten? van boeten
naor binnen, wel wet wat,
wel wet wat d'r speult;
ah, de spotlight
locht dat zeein lat
krek de zun
deur zummer's nat
- Egbert Hovenkamp II-